Төрөөбүт тыл нэдиэлэтигэр саха маҥнайгы лингвист — учуонайа Семен Андреевич Новгородов олоҕун, күүрээннээх үлэтин сырдатар; кини оҥорбут алфавитынан бэчээттэммит учебниктар, хаһыаттар, сурунааллар тустарынан кэпсиир 7 оонньуу- бэсиэдэ 126 оҕону хабан Алампа аатынан уонна Д.А.Петров аатынан оскуолаларга ыытылынна. Сахалартан бастакы философия наукатын доктора Авксентий Егорович Мординов этэн турар: «Сайдар кэскиллээх, бэйэтин омук быһыытынан билинэр норуот кини туһугар үлэ5э олохторун анаабыт үтүө дьоннорун хаһан да умнубат уонна умнуо суохтаах. Саха норуотун үтүө дьонноруттан биирдэстэрэ С.А.Новгородов буолар» — диэн.
Тылга анаммыт нэдиэлэ устата «Таах олоруохтааҕар таабырынна таайсыахха» диэн умсугутуулаах оонньуу биэс кылааска 114 оҕону хабан ыытылынна. Саха мындыр өйө, имигэс толкуйа, хомоҕой тыла- өһө билиҥҥи оҕо толкуйдуур дьоҕурун, фантазиятын сайыннарар, өбүгэлэрбит олохторун, дьарыктарын кытта билиһиннэрэр эбит.
Олунньу 13 күнүгэр «Төрөөбүт тылым — мин баайым» диэн тыл оонньуута Эдуард Карлович Пекарскай тылдьыта бэчээттэммитэ 125 сылыгар ананан ыытыллыбыта.