1 Звезда2 Звезды3 Звезды4 Звезды5 Звезд (Пока оценок нет)
Загрузка...
397 просмотров

1965

Паартаҕа олорорбун сөбүлүүр этим

Сметанина Антонина Константиновна
Элбэх баҕайы түннүктээх уһун баҕайы дьиэҕэ оскуолаҕа киирбиппин өйдүүбүн. Аантан улаҕаа сүүрэрбэр сылайар курдук этим. Санаабар оннук уһун улахан оскуола этэ. Аны икки аҥы аһыллар ааннардаах, иһинэн- таһынан хатааһыннардаах этилэр. Кылаас аайы паарта бөҕө. Паартаҕа олорорбун сөбүлүүр этим. Тоҕо диэтэргит- иһинэн полкалаах. Тураргар хаппаҕын арыйан тураҕын. Кылааспытыгар элбэхпит. Үксэ уолаттар этэ. Перемена буолла да саабылаһа оонньуулар. Уолаттары кытта саабылалаһа оонньоотоххо төбөбүтүн быһыта охсор этилэр, ол иһин кыргыттар туспа иэс баасса оонньуубут. Иэс баасса диэн – биир киһин таарыйан баран куотаҕын. Ол киһи эккирэтээччи буолар. Таарыллыбыт киһи эккирэтээччи буолан иһэр. Төһө баҕарар буолан оонньуохха сөп. Ол барыта сүүрүүлээх оонньуулар. Наһаа айдааннаахпыт буолуо ону сороҕор учуутал тахсан коридорга олордотолоон баран харчы кута оонньотор этэ. Тимэх дуу кэпиэйкэ дуу илиигэр угар. Оччоҕо эн ойон тураҥҥын кутааччы буолаҕын. Таайдахтарына эйиигин икки илиилэринэн бүөлүү тутуохтаахтар.
Ол саҕана оскуолабытыгар оһох бөҕө баара. Онно анаан минээн тула туран эрэ иттэрбит. Ол да буоллар биир да оҕо эйиигин дьээбэлээн да алҕас да оһоххо аспатаҕа. Онон син бэрээдэк баар эбит.
Октябренокка, пионерга киирэргэ дьэ алдьархай. Дьоһумсуйуу бөҕө. Устаап үөрэтиитэ игин. Комсомолга киирэргэ эмиэ долгуйуу кытаанаҕа этэ. Улахан дуоһунаһы сүгэр курдук сананарбыт. Бары биир халыып курдук таҥнар этибит. Кыһыл хаалтыс, бороҥ өҥнөөх школьнай форма, маҥан саҕалаах уонна бэриэнньиктээх буолар Уолаттар формалара күөх өҥнөөх, тимир өҥнөөх тимэхтээх ыстааннаах көстүүм этэ.
Оскуолатааҕы сылларбар саамай үөрбүппүн өйдүүрүм диэн саҥа дьылга нэһиилэ көтөҕөр бадаарак ылбыппын. Дьиэбэр нэһиилэ кэлбитим. Оҕо курдук көтөҕөн. Онно аҕам:”Кэтэһэммин ылан кэлбэккэбин»- диэбитин наһаа өйдүүбүн.
Таһырдьа лапталыыбыт, кинээйдэһии диэн баара. Ону соччо сөбүлээбэт этим. Тоҕо диэтэххэ быыкаа мээчигинэн оонньонуллар. Ол мээчигинэн быһа быраҕан кэбиһэллэр этэ.
Улаатан баран уол кыыс кистээн саппыыска ыытыһыы игин баара. Уонна тахсан переменаҕа тэбис тэҥҥэ охсуһаҕын да оонньуугун да.

Хаартыскаҕа Таатта, Баайаҕатын 1971 сыллаах 6 а кылааһын үөрэнээччилэрэ паарта хаппаҕын арыйан тураллара көстөр.

Добавить комментарий

Ваш адрес email не будет опубликован. Обязательные поля помечены *