1 Звезда2 Звезды3 Звезды4 Звезды5 Звезд (1 оценок, среднее: 5,00 из 5)
Загрузка...
287 просмотров

Венера

ИЙЭМ МИЭХЭ КИНИГЭ ААҔАР

… кинигэни кытары адьас эрдэ билсибитим. Чуолаан саха суруйааччыларын айымньыларын кытары. Сахалыы кинигэ оччолорго дэлэйдик атыыланара. Кинигэни миэхэ ийэм киэһэ аайы ааҕан иһитиннэрэрэ. Ол аахпытын ойуу курдук өйбөр оҥорон көрөрүм, истибитим илэ-бааччы көстүү буолан тиллэн кэлэрэ. Сүһүөхтээн ааҕар буолбутум кэннэ да, бэйэм ааҕан эрэйдэнэрбинээҕэр, ийэбин аахтаран эрэйдиирбин ордорорум. Кинигэҕэ суруллубуту кэлин да чугастык ылынар этим. Кинигэҕэ баар олоҕу олохпор дьүөрэлээн көрөрүм, кинигэҕэ баары үтүктэн оонньооммун үлүһүйэрим. Ол үлүһүйүүм билигин да ааһа илик — кинигэтэ суох киһи хайдах олоруоҕун сатаан санаабаппын. Сорох ыал аҥаар кырыытыттан мал бөҕөтүн мунньубут буолар. Ол оннугар биир да кинигэни долбуурдарыгар булан көрүөҥ суоҕа. Дьэ дьикти. Кинигэни киинэ, хаһыаты тэлэбиисэр, илэ-бааччыны көмпүүтэр солбуйарын саҕана мин оҕолорум кинигэ ааҕалларын сөбүлүүллэр. Ол өттүгэр баҕас оҕолорбун кытары куомуннаахпыттан испэр үөрэбин. Оттон атын аралдьыйыы суох буолан, кинигэнэн эрэ саатаабыт оҕо сааһым кэмигэр махтанабын эрэ. Кыһыҥҥы уһун киэһэлэргэ ийэм миэхэ кинигэ ааҕар — онтон ордук үчүгэй ама туох баар үһүө.