1 Звезда2 Звезды3 Звезды4 Звезды5 Звезд (1 оценок, среднее: 5,00 из 5)
Загрузка...
528 просмотров

Сэмэн Тумат

Семен Андреевич Попов- Сэмэн Тумат, саха народнай суруйааччыта. Филологическай, литературнай үөрэхтээхпин. СГУ саха салаатын 1973 с. үөрэнэн бүтэрбитим. Үөрэхпин бүтэрээт Ойуунускай аатынан Литературнай музейга старшай научнай сотруднигынан үлэлээбитим. Онтон  “Эдэр коммунист” хаһыакка 1979-1983сыллардаахха  тыа хаһаайыстыбатын отделыгар корреспонденнаабытым. 1996- 2015 сылларга “Чолбон” сурунаал публицистикаҕа салаатын үлэтин салайбытым. Билигин пенсионербын, 1944 сыллаах төрүөхпүн. Литературнай үлэнэн дьарыктанабын.

Оҕо сылдьан Пушкин остуоруйаларын таптаан ааҕарым. Белоруссия партизаннарын хорсун быһыытын кэпсиир “Константин Заслонов” диэн Леонтий Раковскай кинигэтин, аатырбыт “Робинзон Крузону”, “Дети капитана Гранта” мүччүргэннээх сырыыларын ааҕа олорор долгутуулаах чаастарбын билигин да өйдүүбүн. Саха суруйааччыларын айымньыларын көтүппэт этим. Бу кинигэлэр оччотооҕу оҕо дууһатын олус үчүгэйдик арыйаллара, ол курдук тардыылаахтара.

Кэнники судаарыстыба көмүскэлигэр сыһыаннаах мемуардары ааҕарым. Сэбиэскэй кэмнээҕи эдэр киһи өйүгэр- санаатыгар Шолохов Михаил Александрович  “Киһи дьылҕата” сэһэнэ, Николай Островскай “Ыстаал хайдах хатарыллыбытай”, Дмитрий Фурманов “Чапаев” кинигэлэрэ чугастара. Сахалартан Өксөкүлээх “Ырыа- хоһоон”, Амма Аччыгыйа “Сааскы кэмин”, Петр Филиппов Максим Аммосов туһунан “Революция саллаата” кинигэтин, Иван Строд “В якутской тайге” ахтыы кинигэтин аахпыппын өйдүүбүн.

Олох киһи интэриэһин уларытарын курдук ааҕыы эмиэ уларыйар. Билигин  мемуардары ааҕабын. “М.А.Шолохов” диэн 2000 страницалаах кинигэни, Анна Ахматова, Василий Шукшин олохторун, дьылҕаларын туһунан ЖЗЛ серияттан булан аахтым.