1 Звезда2 Звезды3 Звезды4 Звезды5 Звезд (3 оценок, среднее: 5,00 из 5)
Загрузка...
331 просмотров

Үөрэнэ барартан аккаастанар…

Балаҕан ыйын бастакы бырааһынньык күнэ ааһан бастакы үөрэх чиэппэрэ саҕаланна. Ону кытта, сорох дьиэ кэргэҥҥэ үөрэн- көтөн оскуола боруогун атыллаабыт үөрэнээччилэрэ, сарсыарда аайы, ол оскуолатыгар барыан баҕарбат айдаанынан күнүн саҕалыыр…Тоҕо?
Психолог М.Баулина оҕо маннык быһыыланара хайаан да туох эрэ төрүөттээх буолар диир эбит. Дьэ ол туох төрүөттэрий, хайдах гынан оҕо бэйэтэ сөбүлэһэн оскуолатыгар барарын ситиһэбит? – диэн ыйытыыга маннык сүбэлэри биэрэр.
1. Саҥа сиргэ үөрэнэн биэрбэккэ эрэйдэнэрэ буолуо. Бастакы кылаас үөрэнээччитэ буоллаҕына ол син даҕаны: кини оҕо саадыгар курдук манна оонньуон баҕарара буолуо, ол оннугар үлэлииргэ күһэллэр…Эбиитин элбэх билбэт оҕолоро бааллар…
Бастакы кылаас оҕото ортотунан 2-3 ый устата кылаас олоҕун кытта кэргэнниһэр. Онтон уһаатаҕына учуутал, психолог көмөлөрө наада буолуо. Ол иннинэ оҕону кытта кэпсэтэн, оскуолаҕа тугу сөбүлүүрүн, тугу сирэрин билин; оскуолаҕа барбыта туох үчүгэйдээҕэр болҕомтотун хатаан.
2. Үөрэҕин кыайбатын, ситиспэтин иһин төрөппүттэрэ сэмэлиир, үчүгэйдик үөрэниэхтээҕин куруук санатар буоллахтарына оҕо кинилэр эрэллэрин толорботох курдук сананарыттан, кинилэри хомотобун дии саныырыттан оскуолаҕа барыан баҕарбат.
Оччотугар, төрөппүт биири өйдүөн наада: оҕо төрөппүт иннигэр үчүгэйдик үөрэниэхтээх буолбатах; кини бэйэтэ туспа кыахтардаах, атын баҕа санаалардаах туспа киһи буолар. Учууталы кытта кэпсэтэн тоҕо ситиспэтин өйдүү сатаан, көмөлөһөргө дьулуһун.
3. Өссө биир төрүөтүнэн, оҕо оскуола туһунан санаата түспүтэ буолуон сөп. Кини оҕо саадыгар сырыттаҕына, оскуолаҕа хайдах курдук үчүгэйин, интэриэһинэйин, көрдөөҕүн туһунан төһөлөөх кэпсээбиттэрэй…Онтон быйыл оннук санаалаах үөрэн- көтөн кэлбитэ, үөрэнэр диэн төрүт да оннук көрдөөх буолбатах эбит, киниттэн ирдииллэрэ элбэҕэ бэрт эбит…
Онон, оскуола олоҕун туһунан кырдьыгы кэпсииргэ дьулуһун диэн сүбэлииллэр. Уруоктарга айдаана суох тулуйан истэрин, дьиэтээҕи үлэ хайаан да толоруллуохтааҕын, кылааһыгар баар оҕолору кытта доҕордоһор үчүгэйин, оскуолаҕа араас куруһуоктарга дьарыктаныахха сөбүн…
4. Улаханнык сылайар буолан оскуолаҕа барартан аккаастаныан эмиэ сөп. Уруогу таһынан күн аайы куруһуокка, репетиторга, секцияҕа сылдьан илистэр буоллаҕына төрөппүт оҕо күннээҕи олоҕун сынньанар, оонньуур кэмнээх гына сөпкө аттарыахтаах.
5. Сайдыытыгар проблемалаах оҕо хара маҥнайгыттан ситиспэккэ эрэйдэниэ, биир сиргэ тулуйан олорбокко кылааһы ыһыа, тугу ирдииллэрин өйдүө суоҕа. Оччотугар специалистары кытта кэпсэтэн сайыннарар эбии үөрэҕи дуу, атын программалаах дьарыктары дуу кэпсэтиэххэ сөп.
6. Учууталы кытта дуу оҕону кытта дуу тапсыбакка оскуолаҕа барартан аккаастаныан сөп. Маннык быһыы тахсыбатын туһугар күн аайы оҕону кытта оскуола олоҕун туһунан кэпсэтин, сүбэлээҥ, бэйэҕит уопуккутун туһаныҥ. Оҕоҕут өйөбүллээхпин диэн эрэллээхтик сананарын ситиһин.
(матырыйаал интернет ситимиттэн ылылынна)