1 Звезда2 Звезды3 Звезды4 Звезды5 Звезд (Пока оценок нет)
Загрузка...
512 просмотров

1964

Мин ийэм Маайыстыыр

Мин Скрябина- Винокурова Галина Прокопьевна 1964 сыллаахха,олунньу 2 күнүгэр Кэбээйи орйуонугар, Батамаайы бөһүөлэгэр төрөөбүтүм.
Иккис дойдум, ийэм дойдута Нам оройуонун, Модут бөһүөлэгэ, манна оҕо сааһым ааспыта, детсадка неделяннан хонуктаахха иитиллэн, улаатан, онтон Модут 8 кылаастаах оскуолатыгар,онтон Нам Хатырык дэриэбинэтигэр орто кылаастаах оскуоланы бүтэрбитим.
Дьиэ кэргэммэр бииргэ төрөөбүттэр сэттиэбит, 4 уол, 3 кыыс.
Күн-күбэй ийэм Винокурова-Дьяконова Мария Яковлевна, Нам оройуонугар соҕуруу Хатырык уонна Модут нэһилиэгин кытта быысаһан «Кыһыл Талаһа» аатынан колхозка Дьаакынаптар диэн үлэһит дьиэ кэргэҥҥэ ыам ыйын 5 күнүгэр 1930 сыллаахха бастакы оҕоннон күн сирин көрбүтэ.
Бу колхоз аатын норуот ытыктыыр общественнай деятельбит М.К.Аммосов төрөөбүт дойдута буолан «уолбут кыһыллар улахан киһилэрэ» диэн олохтоохтор «Кыһыл» талаһалаах диэн бөһүөлэк аннынан сытар күөллэрин аатын холбоон «Кыһыл Талаһа» диэн биир сүбэннэн ааттаабыттар эбит. Ийэбит сэрии кэмигэр подросток кыыс, колкуоска оҕуруокка турнепыс,хортуоска,олордуутугар,хостооһунугар,үлэлэспитин,кэпсиирэ.
Ийэм Маайа Валера диэн уол оҕолооҕо, эбээ-эһээ тапталлаах бастакы сиэннэрэ эбит, онтон ийэм аҕабытын, киномеханик идэтин бүтэрэн ананан кэлбит уолу Винокуров Прокопий Иннокентьевиһы көрсөн, билсэн, эдэр дьон сүрэхтэрин холбоон ыал буолбуттар. Аҕабытын Боруонньаны үлэтинэн анааннар Кэбээйигэ көһөн барар буолаллар, кыра уолу Валерканы ийэм дьоно хааллаттаран быыкаа уол эһээлээх-эбээтигэр иитиллэ хаалбыт.
Аҕам Боруонньа Кэбээйи оройуонугар Сэбээн уонна Сиэгэн дэриэбинэлэринэн киномеханигынан үлэлээн, эдэр ыал манна олохсуйан олорон 3 оҕо күн сирин манна көрбүттэр,Ньургун,Зина,Аркадий.
Биир убайбын Кешаны Намҥа оҕоломмут.
Ийэм барахсан төһө да кыра оҕолордоох буолла аҕабытын кытта батыһа сылдьан киномоториһынан үлэлээбит, оччолорго дизэлинэн киинэ көрдөрөллөр, уот суох,ийэм киинэ аппараатын таһыгар аҕабынаан туралларын хаартыскалара баарын көрдөрөн кэпсиирэ. Кэлин Кэбээйи Батамаайы дэриэбинэтигэр тиийэн олохсуйбуттар. Манна 1961 сыллаахха эдьиийим Света күн сирин көрбүт, онтон 1964 с ийэм миигин оҕоломмут, ол гынан мин 7-тэ ыйдаах эрдэхпинэ, аҕабыт соһуччу кустуу сылдьан суорума суолланан, ууга түһэн олоҕо быстаахтаабыт, ийэбит барахсан 6 та оҕолоох огдообо хаалаахтаабыт. Ийэм аҕата Дьаакып оҕонньор маннык соһумар иэдээнтэн улахан кыыһын, иитимньитэ суох хаалбыт 6 сиэнин аччык аас-туор олохтон быыһаары, Намтан кэлэн паромунан барыларын көһөртөөн илдьэ барбыт. Бу кэмҥэ Кыһыл Талаһа совхоһу бөдөҥсүтэн, Каганович колхоз буолаллар онтон олохтоохтору совхоз тэриллэн Модукка көһөртөөбүт кэмнэрэ. Ийэм Маайа Модутугар кэлээт оҕолорун иитэн киһи-хара оҥороору араас быстах үлэлэргэ үлэлээбит курдук, мин онон-манан өйдүүрбүнэн ийэм хара радикюль суумкалаах, онтугар биирдии аскорбинка битэмиин,биир улахан төгүрүк
таблетканы холбуу кумааҕыга суулаан ыалынан сылдьан эмтэрин түҥэтэрэ, мин ол радикюль суумкатыгар ымсыыран да биэрэрим. Ийэм көһөн кэлэн аҕатын Дьаакыбы, балтын Сибэтилээнэ 3 оҕолорунаан, балта Катя, ийэм 7 оҕолорунаан бары бииргэ Бүтэй Аана диэн совхоз ферматын таһыгар биир дьиэҕэ бары бииргэ олорбуппут, кэлин дэриэбинэҕэ Сивцевтар диэн ыал кыра дьиэлэрин атыылаһан ылан онно көһөн баарпыт, аҕата Дьаакып элбэх оҕолоргун иитэргэр диэн сүөһү өлүүлээбитэ дуу сүөһүлэнэн, дьиэлэнэн ыал ыалынан буола түспүппүт. Тумус туттар ынахпыт Өрүөстэй барахсан үүтүнэн-аһынан аһаан-сиэн олордохпут.
Бүтэй Ааныгар олорон балтынаан индиийскэй киинэ көрө бараллара, биһиги кыргыттар саппай уопсан иһэн, мөҕүллэн, сайыһан ытаһа хааларбыт.
Ийэм дьиэлэммиппит кэннэ оскуолаҕа үлэ көстөн повардаабыта, кэлин пенсияҕа тахсыар дылы уборщиссаннан үлэлээбитэ.
Мин кыра кыысчаан ончу түбүгү билбэккэ, ийэм хонноҕун сылааһыгар киэһээ сыттым да ханнык да, хараҥаттан куттаммат, улахан хаххалаах курдук сананарым, күнү супту оонньоон көҥүл көрүлүүрүм, олус атаах этим.
Өйдүүбүн ийэм оһох ойоҕоһугар олорон миигин утутан түһэҕэр бигиирин, утута охсон баран үлэтигэр бара охсон кэлээри ыксыы олороохтуура буолуо, ол олорон аттыгар олорор эдьиийим Сибиэтэҕэ «эн хайа ыалга бараҕын» диэн сибигинэйэрин мин кулгаах буолан «Айтарыкуолаахха» диэтин кытта «мин эмиэ!»диэн туран кэлэрим, утуйан бүттэхпит ол. Ийэм маҕаһыыҥҥа барарыгар хайаан да иилиҥкэйдэһэн барсарым, сыалым сакалаат сиэри, тиийэн иэттээн плитка сакалаат ылларан ону хайаан да бэйэм тутабын, арыый улам хаалан биир эмэ бэрэбинэ сыыһын булан олоонноон олорон астына мотуйарым сакалааппын, дьэ уонна тугуу да оҥорботох киһи кэриэтэ буолан дьиэбэр тиийэрим, уоһум дэлби сакалаат ньамайданан биллэн тахсан эдьиийим маппыт кыһыытыгар миигин кэһэтээри ийэбэр көмүскэтээри ийэм кэннигэр саһан, сырсан көөчөөн көрө буоларбыт.
Ийэбит Маайа, Маайыстыыр диэн кинини дьон бары ааттыыра олус холку, сымнаҕас майгылааҕа, хаһан да куолаһын сонотон мөхпүтүн өйдөөбөппүн. Ийэбэр атаахтаан, сиргэ төкүнүйэ сытан хаппырыыстыыр кыыһыттан хомойон ылаахтыыра буолуо, ийэккэм барахсан.
Кыра сылдьан ийэм миин астыыр кэмигэр оһоххо кинини үтүктэн быыкаа сыыҥкабай оонньуур миискэбин оһоххо ийэм күөһүн таһыгар ууран миин буһарынарым, ийэм тугу куппутуттан бэрсэрин мииммэр кутан астанан бүтүүтэ, бэт минньигэстик иһэн биһэрим.
Ийэм Маайыстыыр олус үчүгэйдик иистэнэрэ, эдьиийим биһиэхэ сиидэс таҥаһынан тэбис тэҥ гына, атлас лиэнтэннэн киэргэллээн былааччыйа тигэрэ, биһиги ону ыһыахха маанымсыйан астына кэтэрбит. Биир күн мин ийэм иистэнэ олордоҕуна, иистэнэр массыына иннэтэ хайдах хамсыырын бэккэ болҕойон остуолга өҥөйөн сытан, иннэҕэ хаҥас сөмүйэбин уган биэрэн ый-хай түһэрэн ийэбин ууга-уокка түһэрбитим баара. Кэлин наада буолуо диэн, ийэбит таҥас кырадаһынын наар мунньара.
Мин оҕо сылдьан дьиэбитигэр сыһыары турар холудуопкаҕа араас малы, таҥаһы сыымайдыырбын олуһун сөбүлүүрүм, манна былыргы саквояж, араас бэйэ баайыыта куруһубалар, өҥнөөх сабынан киэргэтиллибит оҥоһуу рамкалар, саамай сөбүлээн чемоданы хаһан ийэм эдэр сылдьан кэппит крепдешин былааччыйаларын буларым, наһаа астык,яркай өҥнөөхтөрө, былыргы муода » татьянка» диирэ ийэм, мин олору кэтэн,эргичиҥнээн да биэрэрим.Уһун күнү супту оннук холудуопкаттан тахсыбакка оонньуурум, миигин сураһан «Галиска ханнаный» диэтэхтэринэ ийэм «ээ ханна буолуой холудуопкатыгар сылдьар» диирэ.Өйдүүбүн ийэм
эдэр сылдьан кэппит приталеннай от күөх пиджагын, онтун өргө диэри кэппитэ, өссө былыргы коричневай, удуобунай кыра хобулуктаах демисезонка туфлятын, кэлин да онтун кэтэрэ, биир эмэ бырааһынньыкка бараары гыннаҕына мин онтун баахсалаан тупсаран биэрэрим. Ийэм дьиэ сибэккитин сөбүлээн олордоро, онто симэнэн сибэкки бөҕө буолара, онтон «мокрай Ванька» диэни өйдөөн хаалбыппын.
Ийэбит сахалыы хаһыаты,сурунаалы сөбүлээн суруйтарара,»Бэлэм буол»хаһыаты оҕолоругар хайаан да суруйтаран ааҕарбытын ирдиирэ,онтон кэлин»Чолбон»сурунаалы былдьаһан туран ааҕарбыт.Сахалыы кинигэлэри мунньара,бары дьиэ кэргэнинэн ону сөбүлээн ааҕарбыт.
Ийэбит уҥуоҕунан көбүс-көнө этэ, баттаҕын төбөтүн оройугар эрийэн кырабыайканнан туттара сылдьара, наар былаат баанара, онто көбүс-көнөтүк туттан түргэнник хаамарыгар эйэҥэлээн иһэр буолааччы. Мин эдьиийбинээн Светалыын өр оонньоон кэллэхпитинэ, ааммыт суокканнан баттатыллыбыт буолла да ийэбитин хайа ыалга баартын эндэппэккэ билэрбит, кыһыҥҥы хаарга атаҕын таҥаһын суолунан ийэбитин булан ыларбыт, ийэбит «сыыссыктар атаҕым суолунан начаас буллахтара» диэн күлэрэ.
Ийэм барахсан алаадьытын сытын өрүү ахтабын,саныыбын.Ардахтаах күн, сайын, сылаас күһүн аанын арыйан, оһоҕор алаадьы астыыра. Мин кыра кыыс саҥа тахсыбыт итии алаадьыны үрэн сойутан аһаҕас аан нөҥүө ардах курулатарын көрө-көрө алаадьыбын мотуйарым, оннук ким хайа иннинэ тото охсон, бары остуол тула аһыыр кэмнэригэр саахардаах чэйи эрэ ыймахтыырым. Улахан асаһа суох оҕобун быһыыта, аһылык кэмигэр наар ийэбэр боккуойа суох саахардаах чэйим айдаана буолуо, эһэм Дьаакып дьээбэлэнэн «бу кыыһы хаптаһыҥҥа баайан баран күөлгэ ыытан биһиэххэ баара, онно уутун иһэ-иһэ сырыттын» диэбиттээҕэ.
Ийэм астыыр аһыттан саамай сөбүлүүрүм сгущенкаттан бурдук аһын,сибэккилэри астыырын, эрдэттэн сакаастаһан буһартаран ол аспын оскуолаҕа буолар чаепитияҕа олус күндүтүк санаан илдьэрим.
Ийэм тэлэбиизэргэ сэбиэскэй киинэлэри олус сөбүлээн көрөрө, ончу хас биирдии артыыһы бэккэ билэрэ, «Любовь Орлова, Фаина Раневская, Леонид Утесов, Марина Ладынина» дэтэлээн үөрэ көрөрө.
Эбэм аҕата уус киһи үһү, Нам Көбөкөнүгэр олорбуттар, онон хос эһэм оҥорбут сундууктарыттан ийэм дьоно кыыстарыгар кэргэн тахсан барарыгар энньэлээн биэрдилэр буолуо дуу, ийэм аах 3 сундууктаахтара,олортон миэхэҕэ быыкаа холбуйа сундучок оҕото баар,отой бэйэбин өйдүөхпүттэн онно олорон аһыырым,иһигэр аҕабыттан хаалбыт сэбиэскэй кэминээҕи артыыстар хаартыскаларын игин уура сылдьан сөбүлээн көрөрүм. Ийэбиттэн хаалбыт күндү малым ол сундуугум.
Ийэм барахсан сатыырыттан иистэнэргэ миигин уһуйбатаҕа, бэйэм да ньоҕойдоһон көрдөспөтөхпүн, иистэнэр массыынатын хараҕын харатын курдук харыстыыра.
Сатыырым диэн киниттэн алаадьыны астыыры быһыыта…студенныыр сылларбар дьүөгэлэрим мин алаадьыбын астына сииллэрэ, атын хостон киирэн, «да тоҕо эһиги алаадьыгыт маннык табылларый, наһаа минньигэс» дииллэрэ.
«Майа сайына»диэн ырыаны биһи кыра сылдьан ити биһиги ийэбит туһунан ырыа диирбит, «Маайа сайына»дии-дии ыллыырбыт.
Онон, ийэм барахсан Маайа, Маайыстыыр, саһарчы буспут дыргыл сыттаах алаадьыта, оҕолоругар,сиэннэригэр алгыстаах күндү маанылаах аспыт буолан, биһигини арчылыы, араҥаччылыы турдун! Дойдубар Нам улууһугар,Модут нэһилиэгэр «Сквер Славы» ССРС ийэҕэ Албан Аат орден «Ийэ буолуу» мэтээл хаһаайыннара (7-9 оҕолоох)? памятникка,списокка ийэбит Дьяконова Мария Яковлевна аата суруллан турар.

 Дойдум- Үөдэй
Мин Нам оройуонун Үөдэй нэһилиэгэр совхозтаах Яковлевтар дьиэ кэргэҥҥэ 1964 с. олунньу 3 к. төрдүс оҕонон күн сирин көрбүтүм. Бииргэ төрөөбүт алтыабыт: 2 уол, 4 кыыс. Төрөппүттэрим: ийэм — Аграфена Иннокентьевна, тулаайах, аҕата сэриигэ баран өлбүт, ийэтэ олох кыра эрдэҕинэ ыалдьан суох буолбут, ол иһин куоракка аймахтарыгар иитиллибитэ.      Ийэм, оскуола кэнниттэн Үөдэйгэ комсомольскай путевканан үлэлии  тахса сылдьан аҕабын, тракторист  уолу Дмитрий Гаврильевиһы кытта билсэн, бэйэ-бэйэлэрин сөбүлэһэн ыал буоланнар, олохтоох сельсовекка секретарынан, оҕо уһуйааныгар, оҕо көрөөччүнэн, оскуолаҕа поварынан үлэлээн бочуоттаах сынньалаҥҥа тахсыбыта. Билигин Дьокуускай куоракка балтыбар олорор.
Аҕам Дмитрий Гаврильевич, төһө да хара үлэҕэ сырыттар, хайаан да киэһэ, утуйуон иннинэ ааҕар этэ. Биһиги уруокпутун ааҕарбытын олох хонтуруоллуура. 4 ч.- 6 ч.диэри хайаан да бары остуолга олорон уруок ааҕар этибит. «Аахпатаххытына тугу билиэххитий, тугу да билбэккит, үөрэхтээх, — билиилээх дьон буолуоххутун баҕарар буоллаххытына хайаан да ааҕыҥ!» — диэн кинигэ киһи олоҕор суолтатын, туһалааҕын  билэр буолан куруук этэрэ. Ол иһин кинигэ — билии төрдө буоларын оҕо эрдэхпиттэн өйдүүрүм. Оскуолаҕа үөрэнэр сылларбыттан библиотекаҕа сылдьан нуучча суруйааччыларын кинигэлэрин уларсан ааҕарым.  Дьиэбит биир истиэнэтэ барыта кинигэлэр долбуурдара этэ, уксүн саха суруйааччыларын айымньылара бааллара, төрөппүттэрбит сана кинигэ атыыга таҕыста да, хайаатар да атыылаһаллара. Дьиэбитигэр дьонум «Хотугу сулус» сурунаалы, «кыым», «Эдэр коммунист», оройуоннааҕы «Ленин суола» хаһыаттары, онтон биһиги «Бэлэм буолу» ааҕарбыт.
Биһигини кытары аҕам ийэтэ Прасковья Николаевна олорбута, ийэм оҕо уһуйааныгар суукканан үлэлээн хоноро, ол иһин биһиги эбээбит көрүүтүгэр хааларбыт. Аҕабыт тракторынан совхозка үлэлиир буолан эмиэ үксүн дьиэҕэ суох буолара. Оччолорго оҕо элбэх буолан эбээлээх  оҕолору детсадка ылбаттар этэ. Онон биһиги ити оҕо тэрилтэтигэр сылдьыбатахпыт. Ол гынан баран 7 саастаахпар детсадка сылдьыбатах оҕолору мунньан сайын аҕыйах хонукка оскуолаҕа бэлэмнээн диэн сырытыннарбыттара.

Балаҕан ыйын 1 к. оскуолаҕа аан бастаан барбыппар долгуйбуппун өйдүүбүн. Былыта суох ыраас наһаа үчүгэй күн этэ. Биһигини линейка иннигэр таһааран туруорбуттара уонна хас биирдиибитигэр кумааҕы папка түҥэппиттэрэ, ол иһигэр хас да тэтэрээт, ручка, харандаастар, акварель, альбом бааллара, ол барыта миэнэ буоларыттан наһаа үөрбүтүм. Начальнай кылааска Аграфена Николаевна диэн учуутал үөрэппитэ; кини кылааспытыгар уруок кэнниттэн хаалларан оонньотор этэ. Биһиги дьиэбитигэр суох оонньуурдар бааллара. Холобур, бэйэтэ хаамар робот, атахтара хамсыыр этэ. Учууталбыт барахсан, арааһа, бэйэтин харчытынан атыылаһан биһигини оонньоппута буолуо.
7 кылааһы бүтэрэр сылбар Артекка баран кэлиим оҕо сааһым биир умнуллубат өйдөбүлэ: олох атын оҕолору кытары билсии, ыытыллар тэрээһиннэргэ кыттыы, Крым куораттарынан экскурсиялар, походтар, күрэхтэһиилэр, концертар, биллиилээх дьону кытары көрсүһүүлэр умнуллубаттар. Ол сезоҥҥа омук сириттэн биир да оҕо суоҕа. . .Советскай Срюз араас республикаларыттан бааллара.
8 кылааһы бүтэрэн баран кылааспыт салайааччыта Людмила Семеновна көҕүлээһининэн 8 кыыс сайыҥҥы каникулга сайылыкка фермаҕа ыанньыксыттары солбуйан үлэлээбиппит. «Бэйэҕит үлэлээн хамнастанаҕыт, талбыккытын атыылаһыаххыт, улахан дьон курдук бэйэҕит эрэ олоруоххут» — диэн агитациялаан 2- лии кыыс 4 пара буолан биирдии ыанньыксыты солбуйан үлэлээбиппит. Ынах ыыр уонна сатаан ыабат паралаһабыт. Аспытын бары уочаратынан астыыбыт, муостабытын эмиэ солбуйса сылдьан сууйабыт. Онтон субуота буолла да дэриэбинэҕэ кулуупка үнкүүлүү киирэбит, сатыы сылдьабыт. Биир да массыына суох. Сайылыкпыт син тэйиччи, мырааҥҥа үөһээ баар. Онтон дуоһуйа үҥкүүлээн баран, төһө да уубут кэллэр сарсыардааҥҥы ыамҥа миэстэбитигэр баар буолуохтаахпыт диэн өйдөөммүт түүннэри сайылыкпытыгар эмиэ сатыы барар этибит. Онно аан бастаан үлэлээн ылбыт хамнаспын ыламмын наһаа үөрбүтүм.
Урут, сэбиэскэй кэмҥэ, оскуола оҕолорун араас үлэлэргэ комөлөһүннэрэллэрэ. Саас аайы кылааһынан баран фермалар хаардарын түһэрэрбит. Онтон күһүн хортуоска хостооһунугар үлэлэтэллэрэ. Улахан грузовой массыыналар кузовтарыгар олорон айанныырбыт, автобус суоҕа. Трактор копалканан хостоон таһаарбыт хортуоскатын кыргыттар куулларга хаалыыбыт. Онтон уолаттар ол кууллары баайаллар уонна массыынаҕа тиэйэллэр. Күнүскү аһылыкка үлэһиттэр этинэн миин буһараллара, үлэлээбит оҕолор үөрэ-көтө аһаан эмиэ күүстээх үлэҕэ турунарбыт.
Онтон бэйэбит кэтэх хаһаайыстыбабытыгар от оттооһуна, сир астааһына сыл аайы хатыланар, хайаан да оноһуллар үлэ буолан кыһаммакка үлэлиирбит.

Кулууппутугар киинэ аҕалан көрдөрөллөрө, көрөргөр 5 харчыны төлөөн киирэҕин. Мин биир да киинэни көтүппэккэ сылдьыбытым буолуо. Көрөрбүн наһаа сөбүлүүрүм. Биирдэ кылааспыт салайааччыта Людмила Семеновна сорох оҕолор дьиэтээҕи сорудахтарын толорбокко кэлбиттэригэр барыбытын уруок кэнниттэн хаалларда. Аны ол күн саҥа киинэ көрүөхтээх этим. Мин киинэҕэ сырытыннарбата диэн кыыһыраммын, билэр да боппуруоспун эппиэттээбэккэбин учууталбын хомоппуппун өйдүүбүн. Оҕо сылдьан оскуоланы бүтэрэ охсон
улахан киһи буолаары ыксыыр этим. Оскуолатааҕы сылларын, оҕо сааһын доҕотторо олус күндүтүн кэлин улаатан баран өйдүүгүн.
Ахтыыны суруйдум Ытык Күөллээҕи киин библиотека үлэһитэ Бочорукова Тамара Дмитриевна.
04.06.2018.

Эбэбит үлэҕэ үөрэппит эбит

Т.И.Ноенохова
Биһиги элбэх бииргэ төрөөбүт буоламмыт оскуолаҕа барыы улахан бырааһынньык курдук буолар этэ. Остуол тула олороммут школьнайбытыгар маҕан саҕабытын тигэбит. Маамабыт сороҕор куруһубатын уларытан биэрэр. Барыбытыгар саҥа буолбат, улахаттар эргэлэрэ эйиэхэ кэлэр. Ол курдук тула олорон бары тиктэбит.
Эбэлээх этибит. Үлэ5э үөрэппит эбит. Күөлтэн уу баһабыт, оҕолор бары. Ким чаанньык диэн, ким бөтүөн диэн, ким ыаҕайа диэн… бары субуруһан аҕай кэлэбит. Сүөкээтэхпитинэ син балачча уу буолан эрдэҕэ. Водовоз игин диэн суох, ынырыктаахай көмө буоллаҕа буолуо.
Аны сир астыы барабыт. Эбээбитин батыһан, сатыы сылдьабыт…ити Тараҕана алааһынан игин. Билигин санаатахха биһиги уончалаахпытыгар эбээбит 70-чалаах эбит.
Элбэх буолан таҥаска ымсыырар буоллахпыт дии. Маҕаһыыҥҥа син кэлэр эбит. Маамабыт маҕаһыыҥҥа кэлбит курдук ырбаахыны бэйэтэ тигэн таһаарар этэ. Ол курдук иистэнньэҥ буолан таҥаһынан тутайбакка улааппыт эбиппит. Аҕабыт булчут этэ. Уон оҕо да буолларбыт хаатыҥка диэн кэппэтэхпит. Ынах тыһа этэрбэстээхпит. Холобур сон ылыллар уонна хас да оҕо кэтэр. Сон аллараа эҥээрин капюшон оҥорор этэ, кылгаабыт сону сиэҕин манжеттаан уһатан кэтэрдэллэр. Өйдүүбүн, детсадка баспытааталлар соммун эргитэ сылдьан көрөллөр:
— Уой, наһаа үчүгэй буолбут. Маннык гыныахха баар эбит,- дэһэллэр.
Паапа булчут. Балыктаан кэллэҕинэ ыалларга бэрсэ барабыт, оҕолор бары, маамабыт иһиттэргэ кутан биэрэр. Бөтүрүөптэр эмээхиннэрэ наар кэмпиэт биэрэр этэ, үөрэн ытыһын таһынар. Ыаҕайабын тутабын да ол ыалга урут сүүрэбин.

Кылаас уруһуйдьут уола

Чурапчы оройуонун, Сылан орто оскуолатын үөрэнээччитэ Трофимов Коля уруокка олорон уруучуканан, тэтэрээт лииһигэр, уруһуйдаабыт уруһуйдара. Бу уруһуйдарга оччотооҕу уол оҕо күннээҕи, сайыҥҥы олоҕо, телевизорга, киинэҕэ тугу көрбүтэ, кинигэлэртэн иллюстрациялары үтүктүүлэр көстөллөр. Оччотооҕу дьиэ тэрилэ, таҥна сылдьар таҥас — сап, сайыҥҥы үлэ- хамнас көстөр.

            

 

       

 

1964: 1 комментарий

Добавить комментарий

Ваш адрес email не будет опубликован. Обязательные поля помечены *