1 Звезда2 Звезды3 Звезды4 Звезды5 Звезд (1 оценок, среднее: 5,00 из 5)
Загрузка...
445 просмотров

5 мүнүүтэ – ыстараап!

Оонньууттан матар?!.. Саамай интэриэһинэй кэмҥэ туоратыллар!!…Телефона суох хаалар!!.. Оҕо бу маннык буолуо диэн саныан да баҕарбат. Дьэ ол иһин, ыстырааптыыр 5 мүнүүтэнэн төрөппүт мээнэ куттуур буолбатаҕын оҕолорго өйдөтүөхтээх. Ыстырааптаммат туһугар оҕо элбэҕи тутуһарга, тулуйарга , көннөрүнэргэ бэлэм. Ыстарааптыыр мүнүүтэлэр тустарынан төрөппүт манныгы өйдүөхтээх:
1. Ыстараап чуолаан биир туоратыллыахтаах быһыы иһин туттуллуохтаах. Холобур, кыыскыт охсуһарын суох гынаары туттуллар буоллаҕына хайдах да кини үөхсэрин, хоһун хомуйбатаҕын иһин туттуллуо суохтаах. Бу быраабылаттан туоруур табыллыбат.
2. Ыстарааптанар хос чуҥкук, куттала суох буолуохтаах. Оҕо бэйэтин хоһо олох барсыбат. Ханнык да хос буоллаҕына алдьанар, оонньуохха сөптөөх маллары хомуйар ордук. Кыараҕастык олорор буоллаххытына ыстарааптыыр олоппоһу атын оҕолортон тэйиччи уурар сөп.
3. Ыстараап бириэмэтэ оҕо сааһыттан тутулуктаах: 3-5 саастаах оҕо үс мүнүүтэҕэ сөп буолуо; 5-10 саастаахха биэс мүнүүтэ; онтон аҕа саастаахтары уон мүнүүтэҕэ. Ыстараап этэргэ дылы уһунунааҕар хаачыстыбалаах буоллаҕына ситиһиилээх буолуохтаах. Онон «хаайыы» бириэмэтин уһатар соччолоох ситиһиини аҕалыа суоҕа.
4. Тоҕо, туох иһин, ханна, төһө уһуннук ыстарааптаныахтаахтарын эрдэттэн биллэрэр ордук. Ол кыыһырсыбыт кэмҥэ буолбакка сүбэлэһии бэрээдэгинэн бары холку кэмҥитигэр этиллэрэ ордук.
5. Бу ыстараап оҕолор бэрээдэктээх, үчүгэй дьон буолалларын туһугар киллэриллэрин этэр тоҕоостоох. Оччоҕо хайалара да атаҕастаппыт, сэнэппит курдук сананыа суоҕа.
6. Ыстарааптанар сирдэригэр чаһыы ууран баран улахан стрелка манна кэлиэр дылы диэн быһаарар туһалаах буолуо.
7. Ыстарааптыырынан куттуур буоллаххытына бу иитии олох сыыһа эргийэн тахсыа. Холобур, «Өссө биирдэ куосканы аллараа быраҕыан да ыстарааптаныан» — диир буоллаххытына, өссө да ити быһыы хатыланарыгар ук биэрэҕит.
8. Бары өттүн барытын эрдэттэн ыйааһыннаан, умнубакка утумнаахтык тутуннахха бу миэрэ ситиһиилээх буолар. Бу түбэлтэҕэ оҕо куһаҕаннык быһыыланнаҕына накаастанар мүнүүтэлэр хайаан да тиийэн кэлэллэрэ мүччүрүйбэтин бэркэ билэн көннөрүнэ сатыыр. Онтон кэмиттэн кэмигэр, умна- умна, сороҕор: «Дьэ олоппоско олороору гынаҕын быһыылаах»- диэн хаһыытаан куттуур төрөппүт ситиһиитэ саарбах буолуо.
9. Дьиэҕэ ыстараабы ситиһиилээхтик туһаныахха сөп буолуо. Онтон оҕо уопсай сиргэ, ханна эрэ ыалга, маҕаһыыҥҥа, бырааһынньыкка сылдьан ыстарааптанар быһыытын оҥордоҕуна хайдах буолабыт? Бастакытынан, ыстараап син биир дьиэҕэ тиийдэххэ буолар диэххэ уонна ону хайаан да толорторуохха сөп. Бу түбэлтэҕэ бэрээдэги кэһии уонна ыстараап икки арда уһаан хаалара куһаҕан. Онон киэҥ сиргэ, ыалга, пааркаҕа чуумпу сири булан олордон чуҥкута түһэр сөп буолуо дииллэр.
(матырыйаал оҕо библиотекатын фондатыгар баар Досани С., Кросс П. 52 легких способа общаться с ребенком. Как? кинигэттэн ылылынна)