Оҕо саас сылыгар «Бииргэ ааҕар үчүгэй» бырайыак иитинэн «Кэпсээ» саха суруйааччыларын айымньыларын кэпсээһиҥҥэ күрэхтэһии буолла. Усулуобуйа быһыытынан Ытык Күөл үс оскуолатын маҥнайгы кылаастарыттан иккилии оҕо кэлэн, барыта 12 оҕо тургутустулар. Күрэхтэһии:
- оҕо дьон иннигэр тахсан төрөөбүт тылынан саҥарарын көҕүлээһин
- дьиэ кэргэн иһигэр төрөөбүт тылынан кэпсэтиини өйөөһүн
- тылга дьоҕурдаах оҕолору өйөөһүн соруктары туруорунна.
Кыра кылаас оҕото эрдэттэн бэлэмнэммитин да иһин элбэх киһи көрөн олордоҕуна холкутук, ситимнээхтик кэпсиирэ; куолаһын уларытан, араастаан туттан- хаптан истээччилэр болҕомтолорун тардара; талан ылбыт айымньытын ис хоһоонун кэпсиир дьоҕурунан арыйара уустук.
I миэстэ
Охотин Айтал, «Түһүлгэ» драматическай кулууп, Алампа аатынан оскуола, сал. Винокурова В.Г.
II миэстэ
Хатылыков Айаал, 1в кылаас, Алампа аатынан оскуола, сал. Софронова М.Е.
III миэстэ
Тарабукина Аида, 1а кылаас, лицей, сал. Кузьмина М.С.
Дьүүллүүр сүбэ күрэстэспит оҕолор таһымнара үрдүгүн, кэскиллээхтэрин бэлиэтээн туран барыларыгар анал ааттары иҥэрдэ.
Оҕо кинигэни ааҕар, аахпытын ис хоһоонун өйдөөн сатаан кэпсиир буоллаҕына ырытар, толкуйдуур дьоҕура сайдар, тылын баайа кэҥиир. «Кэпсээ» — саҥа ааҕан эрэр маҥнайгы кылаас үөрэнээччилэригэр мантан ыла үгэс курдук сыл аайы ыытыллара буоллар диэн баҕа санаалаах тарҕастыбыт. Оҕолору бэлэмнээн кытыннарбыт, көҕүлээбит учууталларга, төрөппүттэргэ тэрийээччилэр махталбытын тиэрдэбит!