(4 оценок, среднее: 4,25 из 5)
Загрузка...Бэс ыйын 5 күнүттэн «Школа читательского мастерства» — ааҕыы лааҕыра үлэлээтэ. 2010 сыллаахтан үлэлиир лааҕыр хамсык кэмигэр тохтуу сылдьыбыта.
2-с, 3-с кылааһы бүтэрбит оҕолор уус- уран айымньыны толкуйдаахтык, бытааннык ааҕар техниканан дьарыктаннылар. Күн аайы дьиэлэригэр уларсан бэриллибит испииһэгинэн нуучча, саха суруйааччыларын айымньыларын аахтылар. Аахпыттарын библиотекарга кэпсээтилэр, ырыттылар. Күн аайы артикуляцияны сайыннарар, сөпкө тыынар дьарыктары бардылар. Оҕо координациятын сайыннарар, моторикаҕа туһалаах оонньуулары оонньоотулар. Дорҕоонноох ааҕыы кэнниттэн чуумпу музыканан доҕуһуолланан истибиттэрин уруһуйдаатылар. Бу дьарыктар икки ардыларыгар биир чаас устата Өксөкүлээх Өлөксөй скверыгар баран сүүрэн- көтөн чэбдигирдилэр.
Бэс ыйын саҥатын биир д
ьикти түгэнэ: тэмэлдьигэннэр куукулаттан тахсан, кынаттарын куурдунан көтөр күннэрэ өрүү биһиги лааҕырбыт үлэлиир кэмигэр түбэһэр. Биһиги оҕолорбутугар бу күн сөҕүү- махтайыы, соһуйуу- омуннуруу күнэ буолла.
Лааҕыры суругунан үлэ түмүктээтэ. 40 ыйытыылаах улахан литературнай викторинаҕа кыттан уон күннээх сыралаах үлэлэрин түмүгүн биллилэр. Оҕолор 10 хонук устата 9 айымньыны бэйэлэрэ аахтылар, 9 айымньыны библиотекарь дорҕоонноохтук ааҕан иһитиннэрдэ. «Пирамида» диэн аахпыты сурунар техникаҕа үөрэннилэр. Онон оҕо библиотекатын лааҕырыгар сылдьыбыт оҕолор билиигэ- көрүүгэ кырата суох хардыыны оҥорон сайыны саҕалаатылар.
