Количество просмотров 113
1 Звезда2 Звезды3 Звезды4 Звезды5 Звезд (Пока оценок нет)
Загрузка...

1947

Прасковья
Бииргэ төрөөбүт 4-бүт. Былыргы оҕолор оонньуур суох да буоллар отунан- маһынан, таас бытархайынан оонньуубут. Ол таас саҥа үөдүйэн наһаа күндү. Кумааҕыны эрийэн таҥас кырадаһынынан суулаан, таҥастаан- саптаан, мотуок сап катушкатын, испиискэ хаатын дьоммут мунньубуттарынан, чэй көмүһүнэн, уопсайынан туох көстөрүнэн, ким өйө- санаата туохха тиийэринэн оонньуурбут. Онно эп хабылык, хаамыска, эрилээҥки, тыксаан, дуобат, онно эп мас ынах, оҕус арааһын, туос ынахтары, торбостору, аттары. Өссө сүүрүүлээх оонньуулар: кыыртаах кус, иэс баайсыы, сасыһыы. Остуоруйалаһабыт.          Кумааҕы куукуланы ыал гына оҥоробут: аҕалаан, ийэлээн, хас да оҕолоон, эһээхийдээн…Элбэх оҕолоох буолаллара. Испиискэ хаатынан катушкалаан иистэнэр массыына, сундуук, сиэркилэ, орон, остуол, олоппос оҥорор этибит.Урукку испиискэ хаата мас буолан сундуук кыраһыабай буолара.

         

Онтубутун былыргы суумка буолар дьааһыкка хаалаан, ыалбытыгар Дашалаахха көтөҕөн баран оонньуубут.Оҕо – уруу элбэх буолара, ити сиэркилэҕэ киэргэл остуол (саамай ымсыырар) ол – бу оонньууру уурбут буолаллара, мааны ыаллар. Сиэркилэ икки өттүгэр үрдүк синньигэс вазаҕа сибэкки. Мин саҥастаахпар икки оҕо оонньуура, муос дьэрэкээн өҥнөөх попугай, икки муос, ап- араҥас кус оҕото турар буолара. Таһырдьа ыаллаах буоллахпытына наар аһыыр остуол таһынан киэргэл остуоллаах буоларбыт, ыра санаабыт чыпчаала, саамай кыраһыабай, мааны киэргэл остуол!

Аны маһы сиргэ ууран дьиэ оҥостобут. Хостордоон, ааннаан оҥоробут. Кэлин тигии куукула оҥостор буолбуппут, букатын маастар курдук сананар этим,  абыраатахпына балтыларбар тигэн  биэрэр этим.

Добавить комментарий

Ваш адрес email не будет опубликован.