Муус устар 15 күнүгэр «Бииргэ ааҕар үчүгэй» кулууп оҕолоро библиотекаҕа мустан аахпыт остуоруйаларынан уруһуйдарын, оҥоһуктарын көрдөрдүлэр. Тоҕо бу түгэни ордорон оҥорбуттарын быһаардылар. Оҕо аахпытын өйдүүрүгэр, иҥэринэригэр уруһуй, оҥорон таһаарыы (поделка) олус суолталаах буолаллар. Бу айар түгэнигэр оҕо тоҕо? хайдаҕый? туохха маарынныырый? диэбит курдук араас толкуйдарга түһэр. Ол иһин аахпытын, истибитин үчүгэйдик өйдөөн хаалар. Бу түбэлтэҕэ төрөппүт, оҕото бэйэтэ үчүгэйдик аахпытын кэтээн көрөн, эбэтэр бэйэтэ оҕотугар дорҕоонноохтук ааҕан биэриэн сөп. Уруһуйу, оҥоһугу аахпыт туһунан кэпсэтэ- кэпсэтэ оҕо бэйэтэ оҥороро ордук, туһалаах. Бу бастатан туран оҕо сайдыытыгар туһалаах үлэ буолар. Остуоруйа- кыра оҕо оҥорон көрөр дьоҕурун сайыннарар түҥ былыргыттан тиийэн кэлбит бэртээхэй ньыманы төрөппүт бэйэтин оҕотун иитиитигэр туһанара олус кэрэхсэбиллээх.
Бу кэнниттэн оҕолор болҕомтону, харах үлэтин сайыннарар көрдөөх оонньуулары оонньоон, кинигэ уларсан тарҕастылар.