Загрузка...Тааттатааҕы «Туллукчаан» оҕо библиотеката тэриллибитэ 70 сылыгар анаммыт өрөспүүбүлүкэтээҕи ойуулук (мультфильм) оҥоруутун күрэһин балаһыанньата
Тэрийээччи: Тааттатааҕы «Туллукчаан» оҕо библиотеката.
Сыала: «Туллукчаан уонна кинигэ» остуоруйаны толору арыйар ойуулугу оҥоруу.
Соруктара:
— айар дьоҕуру сайыннарыы;
— ойуулук нөҥүө оҕолору ааҕыыга угуйуу.
Сүрүн ирдэбиллэр:
— Анастасия Егорова «Туллукчаан уонна кинигэ» остуоруйатынан ойуулук оҥоһуллар;
— 14 саастарыгар диэри оҕолор биирдиилээн эбэтэр дьиэ кэргэнинэн, бөлөҕүнэн кытталлар;
— ойуулук остуоруйа ис хоһоонун толору арыйыахтаах;
— кыттааччы ойуулугу оҥороругар араас ньыманы, көрүҥү туһанара көҥүл.
Ыытыллар кэмэ: 2026 с. тохсунньу 16 – ыам ыйын 16 күннэрэ. Кыттааччылар үлэлэрин detbibltullukchaan@yandex.ru электроннай почтаҕа ОЙУУЛУК диэн бэлиэтээн, ааттарын, улуустарын, оскуолаларын, кылаастарын, салайааччыларын ыйан туран, ыыталлар.
Түмүк оҕо библиотекатын сайтыгар tullukchaan.ru ыам ыйын 27 күнүгэр – Россияҕа Библиотека күнүгэр тахсар.
Наҕараадалааһын: кыттааччыларга электроннай Туоһу сурук; кыайыылаахтарга (биирдиилээн уонна бөлөҕүнэн) хайҕал сурук; анал аат бэриллибитин туоһулуур Суруктар бэриллэллэр.
Күрэскэ кыттыы Уопсай балаһыанньаны кытта сөбүлэһэри туоһулуур.
Тэрийээччилэр киирбит үлэлэри бэйэлэрин сайтарыгар, каналларыгар ааптарын ыйан туран угаллара көҥүл.
Харчы киллэрэр сыаллаах туттуллубата мэктиэлэнэр.
Анастасия Егорова остуоруйатын киирэн ааҕыҥ! «Туллукчаан уонна кинигэ»
Туллукчаан уол маскоттарын көрүҥ, ойуулук оҥороргутугар туһаныҥ!
