Загрузка...
85 сыл анараа өттүгэр, 1940 сыллаахха оҕо суруйааччыта Аркадий Гайдар “Тимур и его команда” диэн сэһэни суруйбута “Пионерская правда” хаһыакка бэчээттэммитэ. Маны тэҥэ сэһэни радионан ааҕыылар саҕаламмыттара. Бүтүн Советскай Сойуус оҕолоро бары бу кинигэнэн “ыалдьан” турбуттара. Тимур уонна кини хамаандатын курдук буолуохтарын баҕаран хас дэриэбинэ, куорат ахсын кистэлэҥ хамаандалар тэриллибитинэн барбыттара. Улахан дьонтон ыйыыта- кэрдиитэ суох, оҕолор бэйэлэрэ баҕаран туран, кинигэҕэ курдук биллибэтинэн кырдьаҕастарга, кыамматтарга, сэриигэ барбыт саллаат дьиэ кэргэнигэр көмөлөһөллөрө. Уолаттар да кыргыттар да Тимур курдук буолуохтарын баҕарбыттара.
Эһиилигэр сэһэн кинигэ буолан бэчээттэммитэ. 1986 с. диэри сэһэн 212 төгүл бэчээттэнэн тахсыбыт, 75 тылга тылбаастаммыт. Уопсай тираһа 14,281 мөлүйүөҥҥэ тиийбит.
Саха АССР государственнай издательствота 1942 сыллаахха сэһэни сахалыы тылынан бэчээттээбитэ. Семен Петрович Данилов тылбаастаабыт.
1940 с. саҕаламмыт “Тимуровскай” хамсааһын ССРС эстиэр диэри үлэлээбит.
Тааттатааҕы “Туллукчаан” оҕо библиотеката “Мин ХХ-с үйэ оҕотобун” диэн бырайыагын чэрчитинэн тимуровскай хамсааһын туһунан ХХ-с үйэ пионердарыттан ахтыы хомуйар. Ссылканы баттаан киирэн суруйун. Ыытын. Эһиги ахтыыгыт оҕо саас өйдөбүлэ буолан интернет ситимигэр «Летопись детства» киириэ.