Сахалыы буукубалар Һ, ө, ҕ, ү, ҥ билиҥҥи социальнай ситимнэргэ олорор кэммитигэр күннээҕи сурукка-бичиккэ нууччалыы буукубаларынан солбуллан, туттуллубат буолан эрэллэрэ дьиксиниини үөскэтэр. Төрөөбүт тылбыт сүтэригэр өссө биир ытаһа буолар.
Ол иһин сахалыы сурук-бичик уратытын, кэрэтин көрдөрөр, болҕомтону тардар сыаллаах Тааттатааҕы “Туллукчаан” оҕо библиотекатын “Һөҕүҥ” социальнай бырайыагар кыттыс.
- ҺӨҔҮҤ
Төрөөбүт тыл ыйыгар аналлаах улуустааҕы оҥоһук куонкуруһа
Тэрийээччи: “Туллукчаан” оҕо библиотеката.
Кыттааччылар: уһуйаан иитиллээччилэрэ, 1 -4, 5-8 кылаас оҕолоро.
Сыала: сахалыы сурук-бичик уратытын, кэрэтин көрдөрүү.
Куонкурус ис хоһооно: һ, ө, ҕ, ү, ҥ биэс саха буукубатынан оҥоһук оҥорон көрдөрүү. Буукуба размера, оҥоһуллар материала – хааччаҕа суох. Биир эрэ буукубаны оҥоруохха сөп.
Ирдэбил: кыттыы 100 усунуостаах.
Болдьоҕо: 2025 с. олунньу 1-21 күннэригэр ыытыллар. Үлэлэри Ытык Күөл, А. Мординов уулуссатын 15, “Туллукчаан” оҕо библиотекатыгар тутабыт.
Наҕараадалааһын: кыттаачылар туоһу сурук тутуохтара, кыайыылаахтар грамотанан, анал бирииһинэн наҕараадаланыахтара.
Ыспыраапка: “Һөҕүҥ” хамсааһын туһунан
“Саха сирин култуурата” айар холбоһук уонна СӨ Национальнай бибилэтиэкэтин саха тылын ыччакка сонун ньыманан тарҕатыыга туһуламмыт “ҺӨҔҮҤ” бырайыагы саҕалаабыта.
Бу хамсааһын чэрчитинэн икки төгүллээн “ҺӨҔҮҤ: саха тыла – худуоһунньук хараҕынан” аныгы ускуустуба быыстапкатын, “ҺӨҔҮҤ: сахалыы аймыньы” буктрейлер, “ҺӨҔҮҤ: хоһоонунан хоһуйуу” видеопоэзия күрэхтэрин ыыппыттара, СӨ Национальнай бибилэтиэкэтин тиэргэнигэр “ҺӨҔҮҤ” арт-эбийиэги оҥорторон туруорбуттара.
2. Болҕойуҥ! Виртуальнай акция
ҺӨҔҮҤ
Тааттатааҕы “Туллукчаан” оҕо библиотеката “Саха сирин култуурата” айар холбоһук уонна Саха өрөспүүбүлүкэтин национальнай библиотекатын “ҺӨҔҮҤ” бырайыагар кыттыһан виртуальнай акцияҕа ыҥырар.
Тэрийээччи: “Туллукчаан” оҕо библиотеката.
Кыттааччылар: Сахалыы суругу-бичиги өйөөччүлэр, республика олохтоохторо, оҕолоро.
Акция ис хоһооно: Социальнай ситимнэргэ, күннээҕи сурукка-бичиккэ сахалыы буукубалар Һ, ө, ҕ, ү, ҥ нууччалыы буукубаларынан солбуллан, туттуллубат буолан эрэллэрэ дьиксиниини үөскэтэр. Төрөөбүт тылбыт сүтэригэр өссө биир ытаһа буолар. Ол иһин сахалыы сурук-бичик уратытын, кэрэтин көрдөрөр, болҕомтону тардар сыаллаах айымньылаах хаартыскалары күүтэбит.
Ирдэбил: Сахалыы буукубалар Һ, ө, ҕ, ү, ҥ фоннарыгар, эбэтэр буукубалары тутан, буукуба оҥорон, айымньылаахтык сыһыаннаһан, хаартыскаҕа түһэн, бэйэҕит Вконтакте страницаҕытыгар пост оҥорон #һөҕүҥфото диэн хэштегинан угаргытыгар көрдөһөбүт. Хаартыскаҕа хас буукубаны кытта, хас киһи түһэрэ хааччаҕа суох.
Болдьоҕо: 2025 с. олунньу ый устата.