Эллэй

Саха норуодунай суруйааччыта Серафим Романович Кулачиков – Эллэй төрөөбүтэ 120 сылыгар анаммыт «Туллукчаан» улуустааҕы оҕо библиотеката уонна А.П. Кулаковская аатынан Чычымахтааҕы модельнай библиотека тэрийэр  «Сахам сирин историята Эллэй айымньыларыгар» бырайыак чэрчитинэн сыл устата араас көрүҥнээх үлэлэр, күрэхтэр кулун тутартан саҕалаан ыытылыннылар:

1. Эллэй хоһооннорунан кинигэ оҥоруу улуустааҕы  куонкурус

Эллэй хоһооннорун оҕолорго аахтарар; суруйааччы дойду историятын кэрэһитэ буоларын өйдөтөр сыаллаах ыытылынна. Оҕолор кинигэ тутулун билсэн, кыра кылаас оҕото ааҕарыгар сөптөөх кинигэ оҥорон таһаардылар. Бу кинигэлэр Чычымах библиотекатын пуондатыгар бэрилиннилэр.

2. Эллэй хоһооннорунан улуустааҕы уруһуй куонкуруһа.

Куонкуруска барыта 85 үлэ киирдэ. Оҕолор Эллэй биир хоһоонун ааҕан, айымньы ис хоһоонун уруһуйунан биэрэргэ дьулустулар. Дьүүллүүр сүбэ түөрт бөлөҕүнэн түмүгү таһаарда.

3. Дьиэ кэргэнинэн  уус-уран ааҕыы өрөспүүбүлүкэтээҕи куонкуруһугар  Таатта, Хаҥалас, Ньурба, Үөһээ Бүлүү оройуоннарыттан кыттыыны ыллылар. Дьиэ кэргэттэр бука бары үлэлэригэр санааларын ууран, айымньылаахтык, кыһамньылаахтык сыһыаннаһан  аахпыттара кэрэхсэбиллээх.

Маны таһынан, «Туллукчаан» улуустааҕы оҕо библиотекатыгар алтынньы ый устата “Үөрүүм-көтүүм үрдээ!”: суруйааччы олоҕун, айымньыларын кытта билиһиннэрэр сыаллаах квест-оонньуу ыытыллан 4-5, 6-8 кылаастар барыта 192 оҕо кыттыыны ылла.

Серафим Романович Кулачиков-Эллэй айымньыларын үйэтитэр, сахалыы ааҕыы эйгэтин кэҥэтэр сыалтан “Чурум-Чурумчуку” остуоруйа-поэматынан аудиокинигэ уһуллан “Истэр кинигэ” ютуб каналга угулунна. Поэт бу 1939 сыллаахха оҕолорго анаан суруйбут айымньытын А.Е. Мординов аатынан Тааттатааҕы лицей 7 “а” кылааһын үөрэнээччитэ Кычкин Уран, А.И. Софронов аатынан Ытык Күөл 1 нүөмэрдээх орто оскуолатын 7 “б” кылааһын үөрэнээччитэ Егорова Амелия, 7 “в” кылааһын үөрэнээччитэ Федоров Максим аахтылар.

«Чолбон» сурунаал оскуола саастаах оҕолорго уонна улахан дьоҥҥо өрөспүүбүлүкэтээҕи «Истиҥ кэпсээн» көрүүнү ыытар. Быйыл иккис төгүлүн ыытыттыбыт күрэххэ оҕолор аахпыт аудиокинигэлэрэ кыттыыны ылла. 5-8 кылаастар бөлөхтөрүгэр барыта 38 үлэттэн Егорова Амелия 2 миэстэни, Кычкин Уран 3 миэстэни ылары ситистилэр, Федоров Максим күрэс түмүктүүр түһүмэҕин кыттыылааҕа Бэлиэ суругунан наҕараадаланна. Дьүүллүүр-көрөр сүбэҕэ СӨ үтүөлээх артыыһа, РФ судаарыстыбаннай бириэмийэтин лауреата Иннокентий Луковцев, биллиилээх суруналыыс, поэт Ангелина Шадринова-Суоһааны уонна сурунаал эппиэттиир сэкирэтээрэ Туйаара Павлова үлэлээтилэр.