Загрузка...
Саха Өрөспүүбүлүкэтин үөрэҕириитин үтүөлээх үлэһитэ,РФ үрдүк проф.
үөрэхтээһин бочуоттаах үлэһитэ,Таатта улууһун Ытык олохтооҕо,
литератураны үөрэтээччи,литература кириитигэ Василий Никитич
Протодьяконов сырдык аатыгар анаммыт «Саха уус-уран литературатын таптааччылар» бырайыак биэс сыл устата үлэлээбитин түмүгэр дьоҕус кинигэ таҕыста. Кинигэ саха суруйааччыларын айымньыларын киэҥ ааҕааччыга оҕо тылынан сырдатар сыаллаах.
2019- 2023 сыллар усталарыгар 5-7, 8-9, 10-11 кылаастар үөрэнээччилэрин кытта улахан дьон кытынна. Куонкурус кыттыылаахтара айымньыны ырытарга холонон суругунан үлэ оҥордулар. Биэс сыл устата саха уус- уран литературатыгар Аҕа, Уол, Саха саллаатын, Ийэ, Учуутал уобарастара ырытыллан республика араас улуустарыттан 300-кэ чугаһыыр үлэ киирэн сыаналанна. Сыл аайы куонкуруска киирбит үлэлэр «Туллукчаан» оҕо библиотекатын сайтыгар угуллан испиттэрэ. Хастыы да сыл кыттыбыт оҕолор бааллара тэрийээччилэри үөрдэр.
Уус — уран айымныны ааҕан баран, бэйэ санаатын сатаан таска этэр, аахпыты ырытар, ырыҥалыыр, өссө сурукка тиһии ааҕааччыны сайыннарар, үрдүк таһымҥа таһаарар, билиитин- көрүүтүн кэҥэтэр. Бу таһымҥа ааҕааччы мемуарнай, литератураны ырытар жанрдары ааҕарга көһөр кыахтанар
Кинигэ тахсыытыгар үбүнэн көмөлөспүт «Төлөн АО, ген.директор Рахлеев П.Д., «Саха нефтегазсбыт», ген.директор Лебедев В.Н. улахан махталбытын тиэрдэбит.
Бырайыак ааптардара «Туллукчаан» оҕо библиотеката, Ытык Күөл Алампа аатынан орто оскуолатын саха тылын уонна литературатын учууталларын МХ.
Ссылканан киирэн тыл билимин хандьыдаата, М.К. Аммосов аатынан ХИФУ доцена Матрена Попова кинигэ туһунан санаатын билсиҥ: СЫАНАБЫЛ
Кинигэни атыылаһыан баҕарааччылар оҕо библиотекатыттан билсэ сылдьыҥ.