(4 оценок, среднее: 4,50 из 5)
Загрузка...Ытык Күөл Алампа аатынан оскуолатын 4 в кылаас оҕолоро түөрт сыл устата «Бииргэ ааҕар үчүгэй» кулуупка төрөппүттэрин кытта айымньылаахтык дьарыктаннылар. Кинигэни ааҕыы киһи сайдыытын таһымын көрдөрөр. Уус- уран айымньы киһи киһиэхэ сыһыанын, олоҕу анааран көрөр дьоҕурун сайыннарар, иитэр. Оҕо дьарык нөҥүө ааҕыыга сыстара кэбэҕэс. Дьарык оҕону сэргэхситэр, толкуйдуур кыаҕа сайдар, билиини истэн эрэ буолбакка бэйэтэ кыттыһан, чэпчэкитик ылынар. «Бииргэ ааҕар үчүгэй» кулуупка оҕолор маҥнайгы кылаастан саҥара- иҥэрэ, аахпыттарын кэпсии, араас таһымнаах куонкурустарга толлугаһа суох киирсэн иһэргэ үөрэннилэр. Аахпыттан сүрүнүн арааран ылан Пирамида оҥорорго, истибиттэрин кэпсииргэ, ыйытыы биэрэргэ үөрэннилэр. Түөрт сыл устата оҕо библиотеката ыытар араас тэрээһиннэригэр сүрүн кыттааччы, өйөбүл буоллулар. Оҕолоро алын сүһүөх оскуоланы бүтэрэр үөрүүлээх, түбүктээх күннэригэр кылаас төрөппүттэрэ «Туллукчаан» библиотекаҕа кэрэ бэлэх оҥорон соһуттулар. Оҕолор ырыалаах- тойуктаах кэлэн «Мин ааҕарбын таптыыбын» диэн фотозона бэлэх ууннулар. Күндү ааҕааччыларбыт кинигэни доҕор оҥостон үөрэхтээх,ситиһиилээх дьон буолан тахсыахтара диэн эрэнэбит. Убаастабыллаах төрөппүттэргэ оҕолорун ааҕыыга сыһыарар дьулуурдарын биһириибит, өйүүбүт. Кинигэҕэ таптал ким да төрүөҕүттэн талаана буолбатах, бу төрөппүт оҕоҕо кыһамньытын түмүгэр кэлэр олус үчүгэй дьарык буолар.
