Загрузка...«Туллукчаан» оҕо библиотеката кыра кылаас үөрэнээччилэригэр ааҕыы лааҕырын үлэлэттэ. Тэрээһиннээх ааҕыы оҕону көҕүлүүр диэн 2010 сылтан лааҕыры үлэлэппит буолан эрэллээхтик этэр кыахтаахпыт. Сарсыарда 9.30 –тан күнүс 1 чааска дылы биир да мүнүүтэ иллэҥэ суох сырытталлар да оҕолор салгыбакка үөрэ- көтө дьарыктаннылар диэн элбэх төрөппүт астыммытын биллэрдэ. Бу дьарыктар майгыннаһарар курдуктарын иһин хатыламмат буоланнар оҕо интэриэһэ түспэт, сарсыардаттан үлэлиир санаалаах кэлэр буолан оҕолортон хаалбат. Уонна биир сүрүн кистэлэҥ: уус – уран айымньы абылыыр күүһүгэр сытар дии саныыбыт. Бастыҥ оҕо суруйааччыларын айымньыларын умсугутар күүстэрэ кырачааннарга күнтэн күн саҥаны арыйарга, толкуйдуурга, аһынарга, абарарга, күлэргэ төрүөт биэрдилэр; өйдөрүн- санааларын, уйулҕаларын байыппыттара буолуо диэн эрэнэбит. Күннээҕи үлэ хайдах бэрээдэктээхтик барда?
Оҕолор хас күн аайы бэриллибит испииһэгинэн дьиэҕэ ааҕарга кинигэ уларсаллар. Аахпыттарын сарсыныгар кэлэн библиотекарьга кэпсииллэринэн күн саҕаланар.
Оҕоҕо кинигэни сыҥалыыр наада дуо? Хайаан да наада…Оҕо ханнык суруйааччылар, туох туһунан суруйбуттарын хантан билиэҕэй?.. Ону төрөппүт, учуутал, библиотекарь эрэ билэр. Ол гынан баран бу сыҥалааһын кыаҕын иһинэн буоллаҕына эрэ оҕо устунан ааҕыыга ылларыан сөп. Аргыый аҕай оҕону илиититтэн сиэтэн уус- уран айымньы эйгэтигэр киллэрии: бу буолар биһиги сорукпут. Аахпыттарын кэпсээбиттэрин таһынан тэтэрээттэригэр аахпыт айымньыларын өйдөөн хааларга, ырытар «пирамида» оҥордулар: бу маны бары бииргэ толкуйдаан библиотекары кытта оҥордулар.
Бастакы чаас харах гимнастикатынан саҕаланан ааҕыы техникатын сайыннарар дьарыкка ананар. Онтон биир чаас таһырдьа хамсаныылаах оонньуулар: хомойуох иһин, оҕолорбут, сылтан сыл сүүрэр- көтөр, хамаанданан оонньуулары сатаан оонньообот, бэйэлэрэ толкуйдаан оонньууру сатаабат, ким эрэ тэрийэрин кэтэһэр буолан иһэллэрэ киһини дьиксиннэрэр. Үһүс чаас, үөһэ этиллибит «пирамиданы» оҥоруунан саҕаланар, онтон библиотекарь биир айымньыны дорҕоонноохтук ааҕар. Ааҕа туран тохтоон оҕолору толкуйдатар, саҥардар ыйытыылары биэрэн айымньыны дьүүллэһии буолар. Ол кэнниттэн тута классическай музыка тыаһынан истибит айымньыларын уруһуйдууллар.
Бүттэ. Эттэххэ судургу курдугун иһин «Туллукчаан» оҕо библиотекатын үлэһиттэрин көмөтүнэн 2-3 кылааһы бүтэрбит 26 оҕо сайыҥҥы сынньалаҥнарын айымньылаахтык саҕалаатылар. Бу тэтимнэрин ыһыктыбаттарын наадатыгар төрөппүттэр уус- уран айымньыны ааҕыыга болҕомтону ыһыктымыахтарын наада. Энциклопедияны ааҕан элбэҕи билэр үчүгэйэ биллэр гынан баран, оҕото, ааҕыыны дьарык, олоҕор доҕор оҥостуон баҕарар төрөппүт уус- уран айымньыны аахтарарга сыратын, бириэмэтин кэрэйиэ суохтаах дииллэр эбит ааҕыыны үөрэтэр исписэлиистэр.
