1992

Ойор-көтөр оҕо саас чаҕылхай түгэннэрэ

Мин төрөөбүт дойдум тыйыс тымныытынан аатырар, дохсун сүүрүктээх, дьэҥкир уулаах Индигир өрүс үрдүгэр турар – Өймөкөөн.

Хайа өрүһүн уута, биллэн турар, өҥүрүк куйаас да күннэргэ олус тымныы, сөтүөлүүргэ табыгаһа суох буолар. Инньэ гынан, биһиги оҕолор, саас уу киириитин кэмигэр хааттарбыт уулаах сирдэргэ эрэ сайын сөтүөлүүрбүт. Дьэ, маннык усулуобуйаҕа, аҕам Михаил Афанасьевич Слепцов, үлэлиир тэрилтэтигэр да туһалаах буоллун диэн, оҕолорум дьиэлэриттэн ырааппакка сөтүөлүүр сирдэниэхтэрэ да этэ диэн сыалтан бу курдугу толкуйдаабыта.

Аҕам оччолорго дизельнай электростанция начальнига. Сааскы толоон уута киирэрин саҕана соҕотоҕун сылдьан сөптөөх сирдэринэн быһыттары оҥортолоон, ханааба хаһан станция аттыгар балай да киэҥ, дириҥ гына хаһыллыбыт көнө муннук быһыылаах сиргэ уу мунньара. Үтүмэн уу киирэн, бэйэтэ быһыылыын-таһаалыын да бассейн курдук буолара. Дьэ доҕор, манна сайыны супту куйаас күннэргэ чугастааҕы олорор ыал оҕолоро да, станция үлэһиттэрэ да, оттоон кэлэн иһэн улаханныын кыралыын сөрүүкээн сынньанан, сөтүөлээн тахсарбыт. Чугастыы ыаллыы оҕолор буолан күн аайы кэлэн сөтүөлээн күөлэһийэр этибит. Сорох сиринэн чычаастаах, сорох сиринэн улахан дьон сылдьарыгар дириҥнээх да буолан сөтүөлүүргэ олус “комфортнай”, уута сылааһа, олус да үчүгэй буолара!

Кэлин аҕам сааһыран, улаханнык ыалдьан үлэтиттэн тохтообутун кэннэ, хомойуох иһин, ким да кини курдук ылсыбат буолан, уу улам уолбута, дьон сылдьыбат буолбута. Бу кэмнэр өйбөр оҕо сааһым биир саамай чаҕылхай түгэннэриттэн биирдэрэ буолар.

Ити курдук, аҕам, оҕолорум туһа диэн олус элбэҕи оҥороро. Өссө ахтан-санаан ыллахха бу курдук ахтыы баар. Саас буолла да, оҕо аймах сырылыырын, хаҥкылыырын туохтан да ордорор. Биһи аҕабыт, кыра эрдэхпитинэ биһиэхэ анаан буолунай хаар мунньан гараж үрдүттэн түһэр улахан сыыр оҥорор этэ. Быһыытын таһааран, тоҥон, кытаатан оннун булбутун кэннэ эбиитин үрдүгэр уу кутан мууһурдан букатын “скоростной” сыыр буолан тахсара. Дьэ, сэсиэт оҕолору кытта манна хара сарсыардаттан киэһээҥҥэ диэри аһылыкка, таҥас уларыттарга эрэ тохтоон ыла-ыла арааһынай салааскаларынан, салапаанынан сырылыыр оҥостон, соҕотохтуу да паровозтаан да түһэ оонньоон көр бөҕөтүн көрүлүүр этибит. Кэрэ да кэмнэр буолар этилэр! Бу курдук түгэннэр санаатахха үтүмэн элбэх буоллахтара.

Онон, дьоллоох, бэһиэлэй оҕо сааһы, үгүс элбэх өйгө сотуллубатыы хатаммыт чаҕылхай түгэннэри бэлэхтээбит ийэлээх аҕабар махталым муҥура суох!

Егорова Я.М. 1992 г.р.