Количество просмотров 425
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Минньигэстэн минньигэс баар үһү…

Оҕо биир утуйар кэмэ суох буоллаҕына доруобуйатыгар даҕаны, күннээҕи олоҕор даҕаны сүүйтэриитэ элбиир. Ону бэркэ билэр эрээри куруук кыайтарыылаах хаалар төрөппүккэ маннык кэккэ сүбэлэр бааллар эбит. Сабина Досани уонна Питер Кросс диэн ааптардар «52 легких способа общаться с ребенком.Как?» диэн кинигэҕэ суруйаллар: хас киэһэ аайы салгыбакка маны хатылаатаххытына элбэх проблеманы туоратыаххыт. Туһата суох диэн киэр анньыах иннинэ саатар биир нэдиэлэ сорунан туран толорорго сүбэлииллэр.
1. Утуйар кэм чугаһаабытын туһунан кыһаллыбатах куоласкынан санат. Бастаан биир чаас иннинэ, онтон чаас аҥарын иннинэ. Куоласкыт ити түгэҥҥэ куттуур да, дьаһайар да буолбакка мээнэ этэрдии интонациялаах буолуохтаах.
2. Хоско будильникта холбоо, утуйарга эн оннугар будильник ыҥырдын.
3. Наһаа мэниктээбит оҕо тута уоскуйан утуйара ыараханын учуоттаан, чаас инниттэн дьиэҕэ чуумпутук оонньуулларын тэрий.
4. Утуйуон чаас аҥарын инниттэн бэлэмнэннин: оонньуурдарын хомуйдун, тииһин, сирэйин сууннун, оронун бэлэмнээтин.
5. Күн аайы ааҕыы, ырыа оҕону уоскутарын умнума. Маны оҕо оронун булбутун кэннэ оҥорор ордук.
6. Суорҕанын кичэйэн сап. Хоонньоһор оонньуурдаах буоллаҕына аттыгар уур.
7. Минньигэс түүлү баҕаран, сырылаччы сыллаан баран уоту умулларан тахсан бар.
Түүн ытаан уһуктар буоллаҕына… Оҕо түүн ытыырыгар кыһаллыбат, ахсарбат олох сыыһа. Тута кэлэн туох буолбутун быһаарсар ордук. Ол гынан баран, ытаата эрэ диэн бэйэн ороҥҥор ыларга тиэтэйимэ, аттыгар да наһаа наҕылыйан олорума. Сорох төрөппүт, хас ытаатаҕын аайы туран истэхпинэ, оннук албаһыран, болҕомто тарда сатыа диэн куттанар. Күнүс сөптөөх болҕомтону ылар оҕо оннукка тиийиэ суоҕа дииллэр кинигэ ааптардара. Утуйуон иннинэ – бүгүн бэртээхэй күн ааспытын, кини маладьыаһын- этэн утутар буоллахха болҕомто тардаары ытыа суоҕа.
Түүн турар буоллаҕына… Түүн ортото тиийэн кэллэҕинэ төттөрү оронугар илдьэн утутар биллэн турар ыарахан. Араас биричиинэлээх турааччылар: аһаары, уу иһээри, «буукаттан» куттанан… Наһаа өр кэпсэтэр, куустуһан олорор буоллаххытына кырачаан албынчык «туран манна кэлбитим үчүгэй да эбит» дии саныаҕа. Онон киирэн биэрбэт гына оҕо тугу эрэ сөпкө оҥорбутун хайҕаа. Холобур, бэйэтэ хоһугар (оронугар) төннөн эрэрин. Куруук уһуктан кэлэр буоллаҕына, утуйуон иннинэ сыллыыргар, түүн уһугуннаҕына даҕаны оронугар турбакка сытыахтааҕын санатар ордук.