Количество просмотров 103
1 Звезда2 Звезды3 Звезды4 Звезды5 Звезд (Пока оценок нет)
Загрузка...

Улдьаа Харалы “Иитиэх уол”

Улдьаа Харалы «Иитиэх уол» диэн 2008 сыллаахха суруйбут сэһэнэ. Сэһэн ааптарын толору аата Дорофеев Аркадий Максимович – Улдьаа Харалы.  1994 сылтан прозаҕа холонор. Айымньылара «Чолбон» сурунаалга бэчээттэммиттэрэ. «Бүтүн оҥоруулаах дьон» хомуурунньуга Чурапчыга, «Күүтүллүбэтэх көрсүһүү» кинигэтэ «Бичиккэ» тахсан, ааҕааччы сэнээриитин ылбыттара.

Сэһэн сүрүн геройа Нооһой-Охонооһой тоҕус саастааҕар аҕалара эмискэ ыалдьан, ийэлэрэ оҕолоноору утуу-субуу суох буоланнар, икки кыра балыстарыныын тум тулаайах хаалаллар. «Үс оҕо ийэлээх аҕаларыгар бииргэ олорбут дьоллоох кэмнэрэ бүппүтэ. Кинилэри ыал устун барыы ыарахан дьылҕата, олох эриирдэрин-мускуурдарын тулуйуу күүтэрэ».

Сэһэҥҥэ ойууланар Маппый кинээс уолу бэйэтин оҕолоруттан араара туппат, үчүгэйдик сыһыаннаһар.  Кини атаах, сүрэҕэ суох уолаттара, аттынааҕы сайылык оҕолоро Нооһойу атаҕастыахтарын баҕаралларын өйүнэн кыайар. Үтүө сыһыаннаах буолан, дьадаҥы да, баай да оҕолорго баттаппат, онтуката кэлин улааппытын кэннэ туһалыыр, урут бииргэ оонньообут, кэлин бандьыыт буолбут доҕоро кинини тыыннаах хаалларар.

«Иитиэх уол» сэһэн аныгы олоҕу былыргыны кытта дьүөрэлээн, сиэр-майгы уларыйбат сокуоннарын киэҥник сырдатар. Былыр төгүрүк тулаайах хаалбыт оҕо дьону, олоҕу таптыыр күүһүттэн моһоллору туораан, киһи буолан кииллийэн олоҕун оҥосторо ойууланар. Дьону-сэргэни кытта тапсар, санаатын түһэрбэт киһи элбэ5и ситиһиэн сөбүн ааптар итэҕэтэр. Уол оҕоҕо эр киһи, аҕа оруола улахан оруоллааҕын бигэтик өйдүүбүт.

Сивцева Мария Владимировна,Боробул