Количество просмотров 182
1 Звезда2 Звезды3 Звезды4 Звезды5 Звезд (1 оценок, среднее: 5,00 из 5)
Загрузка...

Софрон Данилов “Икки суол”

Күн сирин көрдөрбүт, олох кэрэтин бэлэхтээбит биһиги төрөппүттэрбит ийэлээх аҕабыт  буолаллар. Кинилэр – олох туллар тутаахтара. Ийэ-аҕа тапталын билэн улааппыт оҕо толору дьоллоох. Мин санаабар, оҕо иитиитигэр ийэ эрэ булбакка аҕа эмиэ улахан оруоллаах. Аҕа дьиэ кэргэҥҥэ баһылык буолар. Ол курдук кини үлэлээн-хамсаан, бултаан-алтаан, булан-талан дьиэ кэргэнин иитэр.

Аҕа – олус муударай, элбэх саҥата суох сылдьан, дьиэ кэргэн боппуруоһун, кыһалҕатын барытын быһаарар. Ол курдук мин Софрон Петрович Данилов “Икки  суол” диэн кэпсээнигэр уол уонна аҕа сыһыанын сэҥээрэн аахпытым. Бу кэпсээн кылгас да буоллар наһаа дириҥ өйдөбүллээх. Манна аҕалаах уол хайыһардыы сылдьаллар. Сыыр кэлбитигэр эр киһи үрдүк сыыры бэйэтэ суол оҥорон сылайдар даҕаны санаата өрө көтөҕүллэн дабайар.  Аҕа уолум мин аттыбынан тахсан иһэрэ буолуо диэн эрэллээх. Уолум сылайдаҕа диэн аһына саныыр. Оттон уола сыыр намыһах өттүн булан, бэлэм суолунан аҕатын быдан иннинэ сыырга тахсыбыт эбит.  Аҕа онтон наһаа хомойор. Уолум олоххо чэпчэки эрэ суолу көрдүүр буоллаҕа дии саныыр. Ол эрээри тугу да саҥарбат, мөхпөт.  Бу эмиэ туспа иитии.  Уол буоллаҕына аҕатын сирэйин-хараҕын көрөн сыыһа гыммытын өйдүүр, аҕатын курдук саҥа суолу оҥорон тахсыбыт буолуон баҕарар. Ол аата аҕа биир тыла суох уолун олох ыарахаттарыттан куоппакка бэйэтэ туспа суоллаах-иистээх, чиэһинэй киһи буоларга үөрэттэ. Бу өйдөбүлү бары да тутуһуохтаахпыт дии саныыбын.

Мин аҕам биһигини, оҕолорун, элбэххэ үөрэтэр, такайар, дурда-хахха буолар. Кини оскуолаҕа ырыа учууталынан үлэлиир. Үлэтин таһынан бултуурун, уһанарын сөбүлүүр. Ийэбит биһигини аҕабытын убаастыырга, тылын истэргэ кыра эрдэхпититтэн үөрэппитэ. Мин аҕабынан киэн туттабын уонна кини аатын түһэн биэрбэт гына кыһаллабын.

Нарыйаана Попова

Ороссолуода орто оскуолатын

5 кылааһын үөрэнээччитэ

Мэҥэ-Хаҥалас улууһа