Борис Неустроев — Мандар

Мин ханна да анал идэ ылар үөрэххэ үөрэммэтэҕим, оскуоланы бүтэрбитим.
Оҕо сылдьан Амма Аччыгыйа «Сааскы кэм», Семушкин «Алитет хайаҕа күрүүр», Эрилик Эристиин кэпсээннэрин хастыыта эмэ ааҕар этим. Билигин да өйдүүбүн: олох айымньы иһигэр киирэн хааларым. Микиитэ Лэглээрин буолан Эрдэлиирдиин үөрэрим- көтөрүм, бандьыыттары кытта сэриилэһэн Улаанчыгынан көтүтэрим. Оччотооҕу оҕо барыта үрүҥ- кыһыл, сэбиэскэй — ньиэмэс буолан оонньуурбут. Сэриилээх кинигэлэри таптыырбыт. Хорсун, чиэһинэй, ийэ дойдуга бэриниилээх дьон буоларга дьулуһарбыт.
Онтон улаатар сааспар А.П.Чехов күлүүлээх- оонньуулаах да, сонньуйуулаах да кэпсээннэрин сынньанаары ааҕарым, билигин да сөбүлүүбүн.

Биһиги эдэр сааспытын Америка суруйааччыта Эрнест Хемингуэй арыаллаабыта. Өйбүтүн- санаабытын уһугуннарбыта. «Старик и море» диэн айымньытын билигин да саныыбын, сороҕор ааҕыахпын баҕаран кэлээччибин да бириэмэ тиийбэт.
Олох киһи интэриэһин уларытарын кытта тэҥҥэ ааҕыы эмиэ уларыйар . Кэнники кэмҥэ
олоҥхолору сааһылаан ааҕабын. Л.Н.Гумилев, Н.Рерих үлэлэрин сэҥээрэбин.
Норуодунай суруйааччыбыт Амма Аччыгыйа «Сааскы кэмэ» билигин да ыччакка этэрэ, үөрэтэрэ олус үгүс. Билигин оскуолаҕа үөрэнэр оҕолор бу айымньыны доҕор оҥостон улааталлара буоллар диэн санаалаахпын. Уопсайынан классика — билии маһын силиһэ буолар.